Öskürək vacib müdafiə refleksidir. Tənəffüs yollarında qıcıqlanma ilə müşayiət olunur və tənəffüs yollarımızı toz, patogenlər, zərərli maddələr və ya yad cisimlər kimi qıcıqlandırıcılardan təmizləmək üçün bədənin qoruyucu funksiyası qismində çıxış edir. Öskürək müxtəlif xəstəliklər zamanı meydana gələn ümumi simptomdur - bəzilərində soyuqdəymə, bronxit kimi o qədər də ciddi olmayan xəstəliklər, bəzilərində isə sətəlcəm, astma, qan laxtalanması və ya ağciyərdə maye yığılması kimi nisbətən daha ciddi xəstəliklər ilə müşayiət olunur. Öskürək müddətinə (kəskin / yarımkəskin / xroniki) və ya selik/bəlğəm ifrazı (yaş və ya bəlğəmli) ilə əlaqəsinin olub-olmamasına (quru və ya bəlğəmsiz) görə təsnif edilə bilər. Normalda tənəffüs yollarımız boğazımızı nəm saxlamaq və bronxların içində nazik bir təbəqəni qoruyub saxlamaq məqsədilə az miqdarda selik ifraz edir. Habelə, tənəffüs yolu ilə yoluxan infeksiyalar zamanı selik çox geniş miqdarda ifraz oluna bilər, bu zaman o, rezin kimi olur və tüpürcəyi/bəlğəmi öskürərək çıxarmaq çətinləşir. Bu baş verərsə, tənəffüs yollarından ifrazatın xaric edilməsini dəstəkləmək, bununla da tıxanan yolları təmizləmək və nəfəs almağı asanlaşdırmaq üçün onu mayeləşdirərək boşaltmaq lazımdır. Bu prosesi dəstəkləmək üçün mukolitiklər və bəlğəmgətiricilər adlanan dərman vasitələri mövcuddur. Digər tərəfdən, quru öskürək zamanı heç bir selik ifraz edilmir. Buna görə də, quru öskürək öskürək refleksini boğan dərmanlarla müalicə edilə bilər.